Басты  /  Сұхбат  /  Нұрланбек ӘЖІБАЕВ: Елдің жетістіктері – Елбасының ерен еңбегі

Нұрланбек ӘЖІБАЕВ: Елдің жетістіктері – Елбасының ерен еңбегі

1947
Нұрланбек ӘЖІБАЕВ: Елдің жетістіктері – Елбасының ерен еңбегі «Нұр Отан» халықтық-демократиялық партиясы өркениетті елдердің ірі партияларымен иық тірестіріп, ізгі істерінен үлгі алып, солардың сара жолымен дамып келеді.

Мәңгілік елдің іргетасын қалап, оның күн санап өсіп-өркендеуіне Мемлекет басшысы өзі бас болып, Ұлт жоспарын бекітіп берді. Елбасының сарабдал саясатын жүзеге асыру һәм тәуелсіздігімізді нығайту үшін жетекші партия бар күш-қуатын жұмсап келеді. Ел Тәуелсіздігінің 25 жылдығына орай біз «Нұр Отан» партиясы Түрксіб аудандық филиалы төрағасының бірінші орынбасары Нұрланбек Әжібаевқа жолығып, партияның өткені мен болашағы туралы аз-кем сұхбаттасқан едік. 

– Егемен еліміздің қасиетті де қастерлі құндылығы – тәуелсіздік. Міне, сол Тәуел­сіздігіміздің 25 жылдығын қандай жетістік­термен қарсы алғалы отырсыздар? Жалпы, тәуелсіздік бізге не берді?
– Тәуелсіз еліміздің Тұңғыш Прези­денті, Елбасы Нұрсұлтан Назарбаев – «Нұр Отан» партиясының негізін қалау­шы. Мемлекет басшысының сарабдал саяса­тының арқасында осындай қысқа уақыт ішінде адам сенбестей жетістіктерге жеттік. Оның бәрін саусақпен санап, түгендеп шығу мүмкін емес. Ширек ғасыр ішінде шекарамызды шегендеп, ұлттық рәміздерді һәм валютамызды бекіттік. Ұлт жоспарын жасадық. Шетелде тарыдай шашырап жүрген қандастарымызды елге шақырдық. Жібек жолын қайта жаңғырт­тық. Өрке­ниетті отыз елдің қатарынан ойып тұрып орын алдық. Әлемде Қазақ­стан деген ел бар екенін дүйім халық, мұқым ел мойындады. Халықаралық додаларда тәуелсіз еліміздің көк байрағы дүркін-дүркін желбіреп жүргені тағы айқын. Күні ертең әлемдік деңгейде «ЭКСПО – 2017» көрмесін өткізгелі отыр­мыз. Міне, осының бәрі – тәуелсіз­діктің тартуы. Елдің жетістіктері – Елбасының ерен еңбегі.
 – Таяуда «Нұр Отан» партиясы Түрксіб аудандық филиалының ХVII есеп беру-сайлау конференциясы болып өтті. Онда қандай мәселелер қаралды? 
– Бұл алқалы басқосуға аудандық партия филиалының басшылары мен Саяси кеңес мүшелері, нұротандық депу­таттар, бастауыш партия ұйым­дарының төрағалары, мекеме басшылары, сондай-ақ бұқаралық ақпарат құрал­дарының өкілдері қатысты.
Конференцияны «Нұр Отан» пар­тиясы Түрксіб аудандық филиалының төрағасы Владимир Устюгов ашып, жүр­гізіп отырды. Партия конференциясында «Нұр Отан» партиясы Түрксіб аудандық филиалы Саяси кеңесінің 2015-2016 жылдарға ар­налған есебі тыңдалды. Негізгі баян­даманы мен жасадым. Сон­дай-ақ осы жиында Саяси кеңес мүше­лерін және «Нұр Отан» партиясы Алматы қалалық филиа­лының кезекті конфе­ренциясына деле­гаттар сайлау мәселелері қаралды. Күн тәртібіндегі мәселелер бірауыздан қабыл­данды.
– Өткен жылдар несімен есте қалды? Атап айтары қайсы?
– 2015-2016 жылдар саяси маңызы зор оқиғаларға толы болды. Ең бастысы, 2015 жылдың 26 сәуірі күні кезектен тыс прези­дент сайлауы болды. Бұл сайлауға біздің ауданның тұрғындары түгел қатысып, оның 89 пайызы партиямыздың Төрағасы Нұрсұлтан Назарбаевқа дауыс берді. Сондай-ақ 2016 жылы Мәжіліс және мәслихат депутаттарының сайлауы өткені мәлім. Міне, осы саяси науқанда да біздің аудан тұрғындары белсенділік танытып, олардың 87 пайызы біздің партияны таңдады. Мұның өзі елдің «Нұр Отан» партиясына деген зор сенімін біл­діреді. 
–Түрксіб аудандық филиалына қа­расты неше бастауыш партия ұйымдары және оның қанша мүшесі бар?
– Бүгінгі таңда «Нұр Отан» партиясы Түрксіб аудандық филиалына қарасты 97 бастауыш партия ұйымдарының 11200 мүшесі бар. Олардың барлығы партия Көшбасшысы Нұрсұлтан Назарбаевтың сарабдал саясатын қолдап, қуаттап келеді.
–Мемлекет басшысы Нұрсұлтан Назарбаевтың стратегиялық маңызы зор жоспарлары мен тапсырмаларына байла­нысты қандай нақты шаралар атқарылды?
–2015 жылдан бүгінгі күнге дейін Елбасы Нұрсұлтан Назарбаевтың «Нұрлы жол», «100 нақты қадам» жобалары бойын­ша 164 жиын өткізілді. Әсіресе, жетекші партияның «Сыбайлас жем­қорлық жоқ ел – өркендеуші ел», «Айқын тариф», «Ба­қыт­ты балалық шақ», «Ардагерлерді ардақ­тайық», «Кедер­гісіз келешек», «Жастар – Отанға», «Сәтті қадам», «Ұлы дала елі» атты сегіз жоба бойынша тұрақты түрде шаралар өткізіп келеміз. Жалпы, Түрксіб аудан­дық филиалының мұрындық болуымен 
583 түрлі саяси-мәдени ша­ра өткізіліп, оған 150 мың адам қа­тысты. Осы уақыт ара­лығында қоғам­дық қабылдауда 859 адам болып, оның 190 арызы оң шешімін тапты. Ал 669 адамға тиісті кеңестер мен түсініктер берілді. 
Елбасы Нұрсұлтан Назарбаев дәстүрлі Жолдауында: «Нұр Отан» партиясына басымдық беріп, қоғам тынысындағы қайбір мәселе болмасын партияның араласуына жол ашып келеді. Сондықтан бүгін «Нұр Отан» партиясының «Қазақ­стан. 2017 мақсаттары. Ұлттық іс-қимыл жоспары» сайлауалды тұғырнамасын, «Қазақстан – 2050 стратегиясы – қалып­тасқан мемлекеттің жаңа саяси бағыты» Жолдауын негізге алып, жауапкершілік пен міндеттер тұрғысында тоқталудың маңызы зор. Партияның XІV съезінде «Халықтық ұйымға айналған «Нұр Отан» менің бастамаларыма қолдау көрсетіп, іргелі істердің ұйытқысы болуда» деген еді. 
«Нұр Отан» партиясы – Қазақстанның саяси жүйесінің келбеті. Қазіргі таңда жетекші партияның ел билігіндегі көш­басшылық рөлі де, атсалысып жүрген жұмыстары да алға басып келеді. Міне, осы саясат партияның алдағы кезеңдерде ұстанатын басым бағыты болып қала бермек. Халық бірлігін, ұлтаралық келі­сім, қазақстандық патриотизмді дамытуға күш сала отырып, мәдени және рухани байлы­ғымызды байыта түсеміз. Осы алға қойған міндеттерді жүзеге асыру үшін күш-жіге­рімізді біріктіруіміз қажет. 
– Әңгімеңізге рақмет!
Сұхбаттасқан 
Ермахан ШАЙХЫҰЛЫ