Светлана Бычкова, Қанат Мусин, Евгений Козлов, Жәмилә Нұрман­бетова, Бекболат Тілеухан сынды бір­қатар депутаттар еліміздің өңірлеріне жұмыс сапары негізінде орталық сот сараптамасы институтына барды. Ал­дымен, депутаттар зертханаларды аралап көрді және орталық сот сарап­тамасы институтының жарақтан­дырылуымен – сот сараптамасын жүр­гізу кезінде пайдаланылатын тал­дау құрал-жабдықтарымен танысты. 
С.Бычкова өз сөзінде «Сот-сарап­тама қызметі туралы» ҚР Заңының жобасын қарастыру жөніндегі жұмыс туралы айтып берді.
– Бұл заң жобасы сот-сараптама қызметін жетілдіру үшін әзірленген. Сарапшылық функцияларды бір мемлекеттік органда орталықтандыру туралы нормалар заң жобасындағы негізгі жаңашылдық. Аталмыш заң жобасы жаңа қылмыстық, қылмыс­тық-процестік, азаматтық-процестік кодекстер мен әкімшілік құқық­бұзушылықтар туралы кодекстің нормаларымен сәйкестікке келтірілді, – деді Мәжіліс депутаты. 
С.Бычкова жеке сот сарапшы­ларының институтын дамыту мәсе­лелеріне ерекше көңіл бөлінгенін, сонымен қатар сот сарапшыларының палатасын құру көзделгенін атап өтті. 
Өз кезегінде ҚР ӘМ ССО дирек­торы Исидор Борчашвили бұл кез­десудің сот сараптамасы орталығының 20 жылдығы қарсаңында өтіп отыр­ған­дығын атап өтіп, орталық қызме­тіндегі негізгі жетістіктерге тоқталды.
– Азаматтардың құқығын қорғауда сарапшылар негізгі бастаушы орынға ие. Өйткені біздің сарапшылар қыл­мыстық және азаматтық істерді, әкім­шілік құқықбұзушылықтарды қа­райтын соттар сияқты барлық құқық қорғау блоктарын қамтамасыз етіп, жұмыс істеп отыр. Біз, сарапшылар, құқық қорғау органдары жіберген ма­териалдар бойынша қорытынды­сын шығарамыз. Сарапшылардың зерттеуі арқасында қылмыстық істердің 50%-ашылып, қылмыскердің кім еке­ні анықталады, – деді И.Борчашвили.
Сонымен қатар ол жақында Қа­рағанды қаласында болған зорлық ісі туралы мысал келтіріп өтті. Онда қыл­мыстық іске мүлдем қатысы жоқ, ол уақытта қылмыс орнында болмаған адамдар жауапкершілікке тартылды. Сарапшылардың зерттеу қорытын­дысы бойынша олардың кінәсіз екені және шын қылмыскерлер анықталған болатын. Мұндай мәліметтер респуб­ли­ка көлемінде өте көп көрінеді. 
Сот сараптамасы орталығы дирек­торы сарапшылардың арнайы ғылыми білімдерін академиялық мүмкіндігін алыс-жақын шетелдерде оқытып, жетілдіру, елдің ЖОО-да магистратура және докторантура бойынша «Сот сараптамасы» мамандығының енгі­зілуі сот-сараптама қызметін дамы­туға айтарлықтай үлес қосқанын ай­тып өтті.
Депутат Қ.Мусин сарапшылардың аз ғана жалақыға қыруар шаруа ат­қаратынын және олардың қорытын­дысы сот ісінде басты негізге алына­тын болғандықтан сарапшыларды күдіктілердің бақылауы мүмкін екенін ескере сот-сарапшыларын патриот екенін ерекше атап өтті. 
Бекболат Тілеухан зертханаларды аралап шыққан соң, сарапшылардың еңбегін бағалау керектігін баса айтып, орналасқан ғимараттың тар екенін айтты. Сонымен қатар депутат сарап­шылардың әлеуметтік орнын көтеру туралы сауал бұл жолғы заңнан қалыс қалса да, алдағы уақытта ол қайта ұсы­нылатынын айтты.
Шара басында ҚР Парламенті қабылдаған жаңа заңнамалық акті­лердің ережелерін талқылауға ерекше көңіл бөлді. Депутаттар кездесуге келген сарапшылар мен журналистер­дің түрлі заңнамалар мен сарапшы­лардың мәселелері туралы сұрақта­рына жауап берді.
Айта кетейік, 2016 жылдың жел­тоқ­сан айында аталған заң жобасын Парламент Мәжілісі екінші оқылымда мақұлдады, қазіргі уақытта жоғарғы палатаның қарауында. 
Көркем ӨМІРӘЛІ