Қазақ «заманына қарай адамы» деген сөзді біліп айтқан-ау... Міне, ұстаздық жолға түс­кенімізге 20 жылға жуықтады, та­лантты бала мен талапшыл ата-ананың талайын көрдік. Дегенмен соңғы жылдардағы игі үрдіс­тер көңілімізді қуантады, үмітімізді жалғай түседі.
Қазіргі ата-аналардың басым бөлігі балаларын тіл білуге итер­мелейді. Бұл үшін бес жерде жұмыс істесе де ақша табуға ықыласты. Арнайы маман жал­дап, үйде немесе арнайы орталық­тарда балаларын оқытып жүрген ата-аналар аз емес. Осы талпынысты өте игі дәстүр деп бағаласақ болады. Өйткені қазіргі жаһандану заманында адамның туған тілін ғана білуі жеткіліксіз. 
Есіме бір қызықты оқиға түседі. Ата-анасы кешке қонаққа баратын болып, өзара орысша сөйлесіп отыр­са, төрт жастан асқан кішкентай қызы: «Сіздер қонаққа баратын сияқтысыз­дар, өйткені орысша сөйлесіп отырсыз­дар ғой» депті. Қазір қазақша, орысша, ағылшынша және түрікше еркін сөйлесе алатын отбасылар бар. Өзге тіл меңгерген ұрпақ жан-жақты болып өседі, өзге елдің дәстүрі мен салтын естіп қана емес, оқып біле алады. 
Жақында Алматы қаласында Бүкіләлемдік Универсиада өтеді. Осы айтулы спорттық шараға еріктілерді іріктеуде жастардың тіл білуі де негізгі талаптың бірі болғаны сөзсіз. 2011 жылғы Азиада қарсаңында да қазақ­тың талантты жеткіншектері осынд­ай шараны белсене атқарысып, ел ықы­ласына бөленгені есімізде. Демек, Қадыр ақын айтатын «Өзге тілдің бәрін біл, өз тіліңді құрметте» деген сөз – осы күннің ақиқаты, осы күннің талабы.
Соңғы жылдары «Болашақ» бағдар­ламасы бойынша шетелдерде білім алатын жастар қатарында қа­зақтілді студенттердің де үлес сал­мағы артып келеді. Бұл да қуа­нар­лық жайт. Өз тілінің қайнарынан қанып ішкен, өзге тілді де мүлтіксіз үйренген қазақ жас­тары ел болашағына қызмет етуге өзде­рін жан-жақты дайындай алаты­нын осылай көрсетіп жатыр. Олардың ара­сында жоғары қызмет­терде нәти­желі жұмыс істеп жатқандар да, түрлі баста­малардың басы-қасында жүргендері де, тіпті Қазақстан және қазақ халқы жайлы ағылшын тілінде кітап шы­ғарғандар да бар. Демек, қазақ жастары қай заманда да прогрессивті, заман талабына сай ұмтылғыш екенін тағы дәлелдеп отыр. 
Осының бәрінің негізі мектепте қаланатыны сөзсіз. Сондықтан қазіргі ата-аналардың мектеп бағдарла­масымен шектеліп қалмай, балала­рына тіл үйрету үшін басқа да өріс іздейтіні қуантады. Қазіргі заманның бір талабы – ішкі туризмді дамыту. Күні ертең-ақ көрікті Көлсайды, тамаша Түргенді, сұлу Сарыарқаны, бұла Бурабайды, аяулы Алтайды, қарт Каспийді көруге келген қонаққа өзіміздің жастар жол бастап, мақтана таныстырып жатпа­сына кім кепіл? 

Кенжегүл ҚҰРМАНЖАНОВА,
Жармұхамбет орта мектебінің мұғалімі
Қарасай ауданы,
Алматы облысы