Қабылдауға алғашқы болып кірген ауылдың клуб меңгерушісі – Байқоңыр Қожамжаров. Ол бірнеше мәселемен келіпті.
– Біріншіден, жастарымыз теріс діни ағымға ермеу үшін ауылға мешіт салуға көмек сұрай келдім. Екінші мәселем, 1998 жылдан бері жөндеу көрмеген ауыл клубына жөндеу жүргізілсе деймін. Сондай-ақ клубта күзетшіден басқа жалғыз өзім жұмыс жасаймын. Қосымша штат бөлінсе деген тілегім бар, – деді ол. 
Аудан әкімінің орынбасары Ерлан Блиев 1100 тұрғыны бар ауылға мешіт салу қажеттілігіне зерттеу жүргізетінін, биыл клубты жөндеу үшін жобалық-сме­талық құжаттар әзірлеуге қаржы бөлінгенін айтты. Сондай-ақ аудандық мә­дениет бөлімі басшысымен хабар­ласып, штат мәселесін шешетінін мә­лім­деді. 
Күмісханым Айтбаева қоғамдық қабылдауға жұмыс мәселесімен келіпті. Айтуынша, былтырдан бері «Қазпошта» бөлімшесінде толық емес жұмыс уақыты жағдайында жұмыс жасайды. Жүргізуші қызметіндегі жолдасының жалақысы да мардымсыз. Отбасында 3 бала бар.
Аудан әкімінің орынбасары мәселе­нің шешілуін бақылауға алатынын айтты. 
Айта кетейік, көшпелі қоғамдық қабылдау бүгін Қайрақты ауылында жалғасады.