Негізгі бет  /  мақалалар  /  Әскерилер Универсиадаға әзір

Әскерилер Универсиадаға әзір

Ғалым СҮЛЕЙМЕН
366
Әскерилер Универсиадаға әзір 18 күннен кейін Алматыда XXVIII Дүниежүзілік қысқы Универсиаданың алауы тұтанады.

Қазір республикамыздың бірқатар өңірлерінің спортшылары және түрлі ұйым мүшелері  жарысқа қызу әзірленуде. Солардың қатарында Қорғаныс министрлігіне қарасты Армияшылардың орталық спорт клубының (АОСК) өкілдері де бар.
– Алматыда Дүниежүзілік Универсиада өтеді деген жаңалықты барша қазақ­стан­дықтар жылы қабылдады. Бұл – ел спорты тарихындағы елеулі оқиға. Себебі, әлемдік дең­гейдегі осындай кешенді жарыс бұрын-соң­ды республика аумағында өтпеген. Сту­денттер арасындағы бұл сайыста 57 мем­лекеттен келген 2 мыңға жуық спортшы қа­тысады. Олар 12 спорт түрі бойынша түр­лі жүлделерді сарапқа салады. Сол күндері әлемнің әр қиырынан келген сан мың турист Алатау баурайына ат басын бұра­ды деп күтілуде. Барлығы да өз жер­лес­теріне жанкүйер болуымен шектеліп қал­­май, әсем шаһарымыздың көрікті жер­лерін аралап, Қазақстанның тамаша таби­ғатына тамсанып қайтады. Осының өзі әлем қауымдастығы алдында мемлеке­тіміз­дің мәртебесін өсіретіні даусыз, – дейді Ар­мияшылардың орталық спорт клубының төрағасы Расул Мейірманов. 
Қорғаныс министрлігіне қарасты ұйым­дар да бұл шарадан шет қалып жатқан жоқ. АОСК сапындағы 9 спортшы Дүние­жү­зілік Универсиадада бақ сынайды. Олар үш спорт түрі бойынша өнер көрсетеді. Мә­селен, биатлоншылар бәсекесінде Али­на Райкованың жолына барша жанкүйерлер үлкен үмітпен қарап отыр. Кіші сержант деген әскери шені бар Райкова осыдан екі жыл бұрын Словакияда өткен қысқы Уни­вер­сиадада алтыннан алқа тағынған бо­ла­тын. Ол 15 шақырымдық жекелеген сайыс­­та алдына жан салмады. Ефрейтор Анна Кистанова сол жарыстың аралас эстафе­та­сында күміс медальді мойнына ілді. Одан бөлек, Кистанованың Азия біріншілігінің кү­міс жүлдегері деген атағы тағы бар. Әлем чем­пионаттарына қатысып, түрлі халық­аралық жарыстарда жүлде алған Максим Браун, Антон Пантов, Дария Усанова және Ва­силий Подкорытов сынды саңлақтарға ар­тылар сенім зор. Осы өрендердің барлы­ғы да 2015 жылғы Дүниежүзілік Универ­сиа­да­да жеңіс тұғырына көтерілген.
Шаңғышылардың сайысында Сергей Малышев пен Марина Матросова өнер көр­сетеді. Бұл спортшыларды жеке-жеке та­­ныстыратын болсақ, 22 жастағы Ма­лы­шев 19 жасында жасындай жарқырап, Ита­л­ияның Трентино қаласында өткен қыс­қы Универсиадада бас жүлдені қанж­ы­ғасына байлады. 2012 жылы ол жасөспірім­дер­дің әлем біріншілігінде күміс және Дү­ние­жүзілік Олимпиадада қола медальді ие­ленді. 26 жастағы Марина Матросова ха­­­лықаралық аренада көптен бері атой са­лып жүрген сақа спортшы. 2013 жылы ол Дү­ниежүзілік әскери-спорттық ойындар мен қысқы Универсиадада үшінші орынға та­бан тіреген.
Талай байрақты бәсекеде жүлде алған шай­балы хоккейден Қазақстан құрамасы бұл жолы алтын тұғырға көтерілуді көз­деу­де. Сол команданың сапында қатардағы жауын­гер Дамир Рыспаев өнер көрсетеді. Құрлықтық хоккей лигасында Астананың «Барыс» клубы сапында біраз тәжірибе жи­ған қазақтың жүректі азаматы Алматы­да­­ғы Балуан шолақ атындағы спорт са­райы­ның мұз айдынында да өзінің өрелі өнерімен көпшілікті қуантады деген ойда­мыз. 
– Мемлекет басшысы Нұрсұлтан Назарбаевтың ерекше қамқорлығының арқасында спорт саласында көптеген игі іс­тер атқарылды, – деп жалғастырды әң­гі­месін подполковник Расул Мейір­ма­нов. – Соның бірі әрі бірегейі Алматыда Дүние­жүзілік Универсиаданың өтуі. Осы жарыс арқылы Алатау баурайында бірқатар спорт­тық нысандар бой көтерді, тағы біразы күр­делі жөндеуден өтті. Осының барлығы елімізде қысқы спорт түрлерінің дамуына тың серпін беретіні сөзсіз. Елбасының бұл бастамасы әскерилер арасында да кеңінен қолдау тапты. Қорғаныс министрі Сәкен Жа­сұзақов та спорт мәселесін үнемі назар­да ұстап, осы саланы серік еткендерге үнемі қолдау көрсетуде. Бұйыртса, Армия­шы­лардың орталық спорт клубы қатарындағы жауынгерлер де қысқы Универсиадада Қа­зақстанның спорттық  даңқының ас­қақ­тауына барынша үлес қосады.
Сөйтіп, АОСК-нің 9 мүшесі Дүние­жүзі­лік Универсиадада Қазақстанның туы ас­тын­да өнер көрсетеді. Қазіргі кезде олар шет­елде өтіп жатқан түрлі жарыстарда шеберліктерін шыңдауда.