Негізгі бет  /  мақалалар  /  БИЕ СҮТІНІҢ ПАЙДАСЫ ШАШ-ЕТЕКТЕН

БИЕ СҮТІНІҢ ПАЙДАСЫ ШАШ-ЕТЕКТЕН

Жомарт Молдахметұлы
2056
БИЕ СҮТІНІҢ ПАЙДАСЫ ШАШ-ЕТЕКТЕН Кеше көрнекті академик-ғалым Төрегелді Шарманов басқаратын Қазақ тағамтану академиясының қызметкерлері бір топ ғалымдар мен БАҚ өкілдеріне еліміз тарихында тұңғыш рет бие сүтінен жасалған қазақстандық өнімдерді таныстырды.

Ұлттық ғылым академиясының академигі, медицина ғылымда­рының докторы Төрегелді Ша­раманов­тың айтуынша, қазіргі күні ел тұрғындарының басым көпшілігі сиыр сүтінен жасалған өнімдерді пайдаланып, осы сүттің құрамындағы транс (ТЖК) май қышқылы кесірінен көресіні көріп жүр. Осыдан құтылудың жолын біраз жылдардан бері жан-жақты зерттеп, бірталай ғылыми ізде­ністерді жүргізген Қазақ тағамтану академиясының қызметкерлері адамзат баласын алуан түрлі ауруға душар ететін аурудың алдын алудың жолын тапты. Академик Шармановтың пікірінше, қазақ­стандықтар үшін қант диабеті, қан қысымы тәрізді сан түрлі аурудан құлан таза айығудың бірден-бір жолы – бие сүті. Сөйтіп, Тағамтану академиясы ғалым­дарының талай жылдар бойғы ізденісі өз нәти­жесін берді. Ғалымдар мен жур­налистер алғаш рет дәмін татқан кәдуілгі бие сүтінен жасалған айран, торт, печенье, балмұздақ және т.б. өнімдер – Шарманов бастаған қазақстандық ғалым­дардың жылдар бойғы ізденісінің жемісі.

Бүгін біз сіздерге өзіміздің Қазақ тағамтану академиясының мамандарының биенің сүтінен жасаған алуан түрлі өнімдерін таныстырып ғана қоймай, тұңғыш рет қазақстандық төл өнімдеріміз­дің тұсауын кесіп отырмыз. Атап айтқанда, академия мамандары бие сүтінен айран, ірімшік, торт, шоколад және балмұздақ тәрізді бірқатар өнімдерді өндіріп, оның адам денсаулығын сақтауда маңызы айрықша екендігіне көз жеткізді. Өзге малдың сүтінен бие сүтінің үлкен өзгешелігі, мұнда транс май қышқылы атымен жоқ. Өзге малдарға қарағанда, жыл­қының майы да, белогы да өзгеше – нәзік. Сондықтан біз бие сүтінен жасалған айран мен құрғақ сүтті, торт пен печеньені, балмұздақ пен шоколадты сіздердің назарла­рыңыз­ға ұсынып, пікір­ле­ріңізді білгенді жөн санап отыр­мыз, – деп ҰҒА академигі, Қазақ тағамтану академиясының пре­зиденті Төрегелді Шарманұлы жиналған қауымды бие сүтінен жасалған тағамдар қойылған дастарқанға шақырды.
«Жақсыны көрмекке» де­гендей, ұлттық медицина ғылымы­ның мүйізі қарағайдай ғалымдары –  С. Сызғанов атындағы ұлттық хирургия институтының бас директоры, меди­цина ғылым­дарының докторы, профес­сор Жеткерген Арзықұлов, С. Асфен­дияров атындағы Қазақ ұлттық медицина уни­верситетінің ректоры, медицина ғылым­дары­ның докторы, профессор Айхан Ақанов бастаған бір топ азаматтар Қазақ тағамтану академиясы ғалымдарының бие сүтінен дайындаған ар алуан тағамның дәмін татып, өздерінің ой-пікір­лері мен тілектерін айтты.
Академик-ғалым ағамыз Төрегелді Шарманұлы біраз жылдан бері бие сүтінен өнім өндіруді жолға қою, сөйтіп, еліміз тұрғындарын ауру атаулыдан құтқару мақсатында ұзақ жылдар бойы еңбектеніп келеді. Бүгін біз сол еңбектің еш кетпегенінің куәсі болып тұрмыз. Өзіміз дәмін татып көрген мына, дәмі тіл үйретін өнімдер Төрегелді ағамыз бен осы академиядағы ғалымдардың тынымсыз еңбегінің нәтижесі. Олай болса, еңбектеріңіз жемісті болсын, игілігін халқымыз көрсін деген тілек айтқым келеді, – деді.
Академиктің айтуынша, қа­зіргі күні қазақ халқы ауылда да, қалада да жылқы малын бей-берекет сойып, рәсуа етуде. Осын­­дай оспадар іс-әрекеттен құтылсақ игі. Ал академик Шарманов ака­демиясының мамандары алдағы уақытта бие сүтінен өндірілген өнім түрлерін Үкімет мүшелері мен Сенат пен Мәжіліс депутат­та­рына таныс­тырып, бие сүті өнім­дері өндірісін жолға қоюды жос­парлап отыр. Олай болса, іске сәт!